Önnur staðnámsvika ARCADE námskeiðsins á Íslandi
Í síðustu viku fór önnur staðnámsvika Arcade námskeiðsins fram á Íslandi. Þar kom saman flottur hópur nemenda úr ýmsum fræðigreinum sem eiga það sameiginlegt að hafa brennandi áhuga á málefnum norðurslóða.
ARCADE er þverfaglegt námskeið sem að byggir á að styðja við nýsköpun og að tengja saman rannsóknir og sérhæfingu ólíkra fræðasviða til þess að bregðast við þeim margvíslegu áskorunum sem steðja að norðurslóðum vegna loftslagsbreytinga.
Á Íslandi fengu nemendur meðal annars kynningu hjá Umhverfis-, orku- og loftslagsráðuneytinu, sóttu Hellisheiðarvirkjun heim og fengu fyrirlestra frá innlendum og erlendum sérfræðingum á málefnasviði norðurslóða og loftslagsmála. Þá fór hópurinn í þriggja daga vettvangsferð á Hala í Suðursveit þar sem áhersla var lögð á afleiðingar loftslagsbreytinga á vistkerfi og nærsamfélög. Í Suðursveit fékk hópurinn Þorvarð Árnason frá Rannsóknasetri Háskóla Íslands á Hornafirði til liðs við sig.
Næsta staðnámsvika fer fram í Nuuk, Grænlandi í ágúst og mun 10 mánaða námskeiði ljúka á Arctic Circle í október.
Að námskeiðinu koma Rannsóknasetur um norðurslóðir og Sjálfbærnistofnun Háskóla Íslands í samstarfi við Ilisimatusarfik háskólann í Nuuk, UiT Norges arktiske universitet í Tromsø, The Arctic Initiative við Kennedy skólann við Harvard háskóla og Hringborð norðurslóða, Arctic Circle.
Nánari upplýsingar um ARCADE má finna á heimasíðu námskeiðsins.
Myndir frá Íslandsvikunni
